tamil

தொடக்கப்பள்ளி மாணவர்களுக்கும் மாற்றுச் சான்றிதழ்: அரசாணை வெளியீடு

Jayaseeli | Thursday, May 25, 2017 9:48 AM IST


உயர்நிலை, மேல்நிலைப் பள்ளிகளில் வழங்கப்படுவதைப் போல் தொடக்க மற்றும் நடுநிலைப்பள்ளி மாணவர்களுக்கும் மாற்றுச் சான்றிதழ் (Transfer Certificate) வழங்க வேண்டும் என அரசாணை வெளியிடப்பட்டுள்ளது. 

இதுகுறித்து பள்ளிக் கல்வித்துறை முதன்மைச் செயலாளர் த.உதயச்சந்திரன் வெளியிட்டுள்ள அரசாணையில் கூறியிருப்பதாவது:தொடக்கக் கல்வி இயக்ககத்தின் கீழ் செயல்படும் ஒன்று முதல் ஐந்தாம் வகுப்பு வரை கொண்ட தொடக்கப் பள்ளிகள் மற்றும் ஒன்று முதல் 8-ஆம் வகுப்பு வரை கொண்ட நடுநிலைப் பள்ளிகளில் பயிலும் மாணவர்கள் தேர்ச்சி பெற்று வேறு பள்ளிகளுக்குச் செல்லும்போதும், பிற காரணங்களால் தற்போது பயிலும் பள்ளியிலிருந்து வேறு பள்ளிக்குச் செல்லும்போதும் அவர்கள் தொடர்ந்து பயில தகுதி நிர்ணயம் செய்திட பதிவுத்தாள் (Record Sheet) வழங்கும் முறை தற்போது கடைப்பிடிக்கப்பட்டு வருகிறது.

இந்நடைமுறையை மாற்றி பள்ளிக் கல்வி இயக்ககம் மற்றும் மெட்ரிக் பள்ளி இயக்ககத்தின் கீழ் செயல்படும் அனைத்து வகை உயர்நிலை, மேல்நிலைப்பள்ளி மாணவர்களுக்கு வழங்கப்படும் மாற்றுச் சான்றிதழைப் (Transfer Certificate) போலவே தொடக்கப் பள்ளி இயக்ககத்தின் மூலம் தொடக்க மற்றும் நடுநிலைப் பள்ளிகளில் பயிலும் மாணவர்களுக்கும் மாற்றுச் சான்றிதழ் வழங்கலாம்.
உயர்நிலை மற்றும் மேல்நிலைப் பள்ளிகளில் பயிலும் மாணவர்களுக்கு சேர்க்கை மற்றும் நீக்கப் பதிவேடு (Admission withdrawal Register) பராமரிப்பது போன்று தொடக்க மற்றும் நடுநிலைப் பள்ளிகளிலும் சேர்க்கை மற்றும் நீக்கப் பதிவேடு பராமரிக்கலாம்.